АЛТНЫ ҮНЭ ӨСЧЭЭ

2014 оны 10 сарын 27

Ам.долларын ханш суларснаар алтны эрэлт өсөж, ханш нь чангараад байгаа тухай “Bloomberg” уламжиллаа. Шар металлын ханш өнгөрсөн пүрэв гаригт сүүлийн нэг долоон хоногийнхоо доод түвшинд хүрч сулраад байсан юм. Нью-Йоркт эбола вирусийн өвчлөл бүртгэгдсэний улмаас дөрвөн өдөр дараалан чангарсан ам.долларын ханш буурсан байна. Түүний зэрэгцээ дэлхийн ихэнх улсуудын ДНБ-ий өсөлт удааширч байгаа нь АНУ-ын эдийн засагт саар үр дагавар авчрах тухай Холбооны нөөцийн сангаас мэдэгдсэн нь долларын ханшийг давхар дарамтад оруулжээ. Ийм мэдээллийн улмаас Нью-Йоркийн “Comex” биржид алтны фьючерс ханш 0.2 хувиар чангарч, 1231.8 ам.долларт хүрээд байна.

Харин Лондонд спот үнэлгээ нь 1232.75 ам.доллартай дүйж байгааг “Kitco”-гийн цахим хуудсанд тэмдэглэжээ. Өнгөрсөн пүрэв гаригт унци алт 1226.3 ам.долларын түвшинд хүрсэн нь аравдугаар сарын 15- наас хойших хамгийн хямд ханшид тооцогдож байлаа. Баасан гаригийн байдлаар алтны арилжаа сүүлийн 100 өдрийн дунджаас 26 хувиар их байсан тухай “Bloomberg” уламжлав.

АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД