ХХААЯ-наас “Мониторинг-2015” ажлыг зохион байгуулжээ

2015 оны 06 сарын 08

ХХААЯ-наас Мал эмнэлгийн хүрээлэнгийн Бабедазол эм үйлдвэрлэх болон зарим халдварт өвчний вакцин үйлдвэрлэх судалгааны бүтээлийг үйлдвэрлэлд нэвтрүүлэхээр төлөвлөжээ. Тус яамны Шинжлэх ухаан, технологийн салбар зөвлөлөөс “Мониторинг-2015” ажлыг зохион байгуулсан байна.

“Мониторинг-2015” ажлын зорилго нь салбарын эрдэм шинжилгээний хүрээлэнгүүдэд хэрэгжиж буй болон хэрэгжиж дууссан шинжлэх ухаан, технологийн төслийн  үр дүнг үйлдвэрлэлд нэвтрүүлэхэд  чиглэжээ. Энэ ажлын хүрээнд дэд сайд Б.Батзоригоор ахлуулсан ажлын хэсэг Улсын мал эмнэлэг, ариун цэврийн төв лаборатори, Мал эмнэлгийн хүрээлэн, Биокомбинат ТӨААТУҮГазар, ШУТИС-ийн харьяа Хүнсний эрдэм шинжилгээний төв зэрэг салбарын эрдэм шинжилгээний байгууллага, үйлдвэрийн газруудын үйл ажиллагаатай танилцжээ.

Энэ үеэр салбарын эрдэмтэн судлаачид ХХААЯ-ны захиалгаар хэрэгжүүлсэн Шинжлэх ухаан, технологийн төслийн үр дүн болон түүгээр гарсан биет бүтээлийн үзэсгэлэнг танилцуулсан байна.Түүнчлэн эрдэм шинжилгээний байгууллага, үйлдвэрийн газрын өнөөгийн байдал, цаашид авч хэрэгжүүлэх шаардлагатай асуудал, арга хэмжээний талаар санал солилцон хамтын ажиллагааны уялдаа холбоог сайжруулах, бодит үр дүнг нэмэгдүүлэх чиглэлээр хамтран ажиллахаар боллоо.

“Мониторинг-2015” ажлын хэсгийн бүрэлдэхүүнд Хүнс, хөдөө аж ахуйн яамны Шинжлэх ухаан, технологийн салбар зөвлөлийн гишүүд, БСШУЯамны төлөөллүүд багтжээ.

АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД