Хог хаягдлыг боловсруулах төслийн талаар санал солилцов

2014 оны 11 сарын 05

Нийслэлийн Засаг дарга Э.Бат-Үүл Австри улсаас Бээжинд Монгол Улсын хэргийг хавсран суугаа Онц бөгөөд Бүрэн эрхт Элчин сайд Ирене Гинер Райхл болон бусад албаны хүмүүсийг хүлээн авч уулзлаа.

Уулзалтаар Улаанбаатар хотын хог хаягдлыг боловсруулан эрчим хүч үйлдвэрлэх төсөлд тавих шаардлага, өнөөгийн хог хаягдлын менежментийн байдал, цаашид төлөвлөж буй шинэ үйл ажиллагаа, хотын дулаан болон цахилгааныг төв шугаманд оруулахаар төлөвлөж байгаа асуудлаар санал солилцов.

Нийслэлийн Засаг даргын 2013-2016 оны үйл ажиллагааны мөрийн хөтөлбөрт хотын хог хаягдлын менежментийг сайжруулах хөтөлбөрийг хэрэгжүүлж, хоёроос доошгүй хог хаягдал дахин боловсруулах үйлдвэр байгуулахаар тусгасан. Энэ дагуу Нарангийн энгэр, Морингийн даваа, Цагаан давааны төвлөрсөн хогийн цэгт өдөрт 2000-2500 тн ахуйн хог хаягдлыг хүлээн авч, дарж устгах үйл ажиллагааг өдөр бүр ландфил технологийн дагуу хийж байна. Мөн хуурай хог хаягдал, цэвэрлэх байгууламжийн лаг, хүнсний, эмнэлгийн, үйлдвэрийн, газрын тосны гаралтай, газар тариалангийн хог хаягдлыг ашиглан өндөр температурын хийжүүлэх технологиор түлш, эрчим хүч үйлдвэрлэх төслийг хэрэгжүүлж, Австри улстай хамтран ажиллах юм.

Уулзалтын үеэр Нийслэлийн Засаг дарга “Австри улс бол техник, технологиор тэргүүлдэг орон. Улаанбаатар хотын хог хаягдлыг боловсруулах үйлдвэрт сайн чанарын техник технологи ашиглах шаардлагатай. Үүнийг дагаад өртөг их өндөртэй. Тийм  учраас Австри улстай хамтран ажиллах хүсэлтэй байна” гэлээ. Харин хатагтай Ирене Улаанбаатар хоттой хамтран ажиллахад бэлэн байгаагаа илэрхийлэв.

АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД