Хувьцаанаас болж хохирсон иргэд хуулийн байгууллагад хандах боломжтой

2015 оны 11 сарын 05

1991 оны өмч хувьчлалаар улсын өмчит үйлдвэрийн газруудыг хувьчлахдаа иргэддээ Хөрөнгө оруулалтын эрхийн бичгээр дамжуулан хувь хүртэх буюу хувьцаа эзэмших эрхийг олгосон. Энэхүү эрхийн бичгээр 1995 он хүртэлх хугацаанд улсын өмчит үйлдвэрийн газруудын хувьчлалд оролцон төрийн өмчөөс хувь хүртэх боломжтой байсан бөгөөд дээрх хугацаанд хөрөнгө оруулалтын эрхийн бичиг гэж нэрлэгдэх “цэнхэр тасалбар”-ыг хувьцаанд, “ягаан тасалбар”-ыг бэлэн мөнгөнд хөрвүүлж эзэмшиж байжээ.
Үүнтэй холбогдуулан нийслэл, аймаг бүрд тухайн үнэт цаасны бүртгэл, хадгалалт, арилжааг хийх эрх бүхий брокер, дилерийн үйл ажиллагаа эрхлэх тусгай зөвшөөрөлтэй үнэт цаасны компаниуд ажиллаж байсан. Зарим тусгай зөвшөөрөлтэй компаниудын хувьд өөрийн хүсэлтээр болон хууль журмыг ханган ажиллаагүйн улмаас үйл ажиллагааг нь зогсоож, тусгай зөвшөөрлийг нь хүчингүй болгож холбогдох хууль хяналтын байгууллагуудад шилжүүлсэн байдаг.
Тус хороонд хувьцаа эзэмшигчдээс үнэт цаасны зах зээлд үйл ажиллагаа эрхэлж буй болон тусгай зөвшөөрөл нь хүчингүй болсон брокер, дилерийн компаниудаар дамжуулан эзэмшигчдийн зөвшөөрөлгүй хувьцаа арилжаалагдсан тухай өргөдөл, гомдол ихээхэн ирсээр байна.
Санхүүгийн зохицуулах хорооны эрх зүйн байдлын тухай хуулийн 6.1.6-д “Хороо нь тусгай зөвшөөрөл эзэмшигч хооронд болон тусгай зөвшөөрөл эзэмшигч, үйлчлүүлэгч хооронд гарсан маргааныг эрх хэмжээнийхээ хүрээнд хянан шийдвэрлэнэ” гэж заасны дагуу үнэт цаасны зах зээлд тусгай зөвшөөрөлтэй үйл ажиллагаа явуулж буй брокер, дилерийн компаниар эзэмшигчийн зөвшөөрөлгүй хувьцаа арилжаалагдсан тохиолдолд хууль, журмын хүрээнд хянан шийдвэрлэж, холбогдох арга хэмжээг авч ажилладаг.
Харин доорх хавсралтад дурдсан тусгай зөвшөөрөл нь хүчингүй болсон үнэт цаасны компаниар хувьцаа зөвшөөрөлгүй зарагдсан, хохирсон гэж үзэж буй иргэд холбогдох хууль, хяналтын байгууллагад хандан шийдвэрлүүлж болох аж.
Тусгай зөвшөөрөл нь хүчингүй болсон үнэт цаасны компаниудын мэдээллийг өнгөрсөн есдүгээр сарын 30-ны өдрийн байдлаар гарган хөрөнгө оруулагч, хувьцаа эзэмшигч нарт мэдээлж байна.
АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД