Баяр уу гуниг уу, мартын 8?

2016 оны 03 сарын 07

Мартын 8 буюу 3 сарын 8-ны өдөр бол олон улсын эмэгтэйчүүдийн эрхийг хамгаалах өдөр юм. Заримдаа энэ өдөр олноороо баярлах, энд тэндхийн караокег ганц өдөр орлого оруулж очерлуулахыг нь харахаар гуниг төрөх шиг ч болох юм.

Монгол улсад эмэгтэйчүүдийн эрх тийм их баярлаж тэмдэглэхээр мундаг хэмжээнд хүрчихэв үү? Царай зүс гайгүй, боловсрол мэдлэг өндөр охидууд их сургуулиа төгсөөд аль нэг албан газар, ажилд ороход маш ойлгомжгүй дарамт, зовлонгууд ирдэг.

Ажлын байрны бэлгийн дарамт гэдэг зүйл эмэгтэй хүнийг ямар ч аргагүй болгож, ажлаа солих эсвэл зохицоод явах сонголтыг үлдээдэг. Энэ харилцаа бизнес төрийн байгууллагад ч маш түгээмэл үзэгдэнэ. Зөвхөн ядруухан айлын харж хандах хүнгүй охидыг дарамтлаад байдаг юм биш.

“Нэг хоолонд ороод тухтайхан ярилцья” гэдэг мессежнээс л дарамт эхлэдэг гэж хэлж болно. Хамгийн шударга бус нь ямар ч нөхцөлд эмэгтэйчүүд муу нэр зүүж үлддэг. Ийм байдлаар биеэр болоод сэтгэл санаагаар хохирсон олон бүсгүйчүүд “Доромжлогдоод” л өнгөрдөг. Энэ бол хамгийн түгээмэл атлаа огт чимээ гаргадаггүй хүчирхийлэл, эмэгтэйчүүдийн эрхийг зөрчиж буй хэлбэр юм.

1999 оны Болор цом яруу найргийн цэнгүүнд яруу найрагч Ц.Хулан “Эр морь хурдлахаа байсан цагт эмэгтэй хүн барилдахаас наагуур ...” гэдэг мөрт уншин бөхийн өргөө тэр аяараа шуугиж байсан. Тэр цагаас хойш 16 жил өнгөрчээ.

Эр морьд хурдалсангүй, харин ч архи ууж худлаа хэнхэгнэсээр эх хүүхдийг л их зовоох шиг боллоо. Өнөөдөр нийгмийн хамгийн идэвхитэй, хөдөлмөрч, хариуцлагатай хэсгийг эмэгтэйчүүд бүрдүүлж байна.

Үүнийг Замын үүдийн хилийн боомт дээр хэдэн зуугаараа очерлож зогсох 69 машин дотор суусан “Эгч” нараас харж болно, наран туул зах дээр бөмбийтлөө дааран зогсох “Эгээ” нараас мэдэж болно.

Энэ өдөр эмэгтэйчүүдийн хорих 407-р ангид хэдэн зуун бүсгүйчүүд хоригдож буй. Хашаанд нь байх нярайн тасагт хорих ангиас амьдралынхаа гарааг эхлэж буй бяцхан үрс торниж байна.

Тэдний “Үйлдсэн” хэрэг нь залилан болоод хүн амины хэрэг зонхилно. Хаяад явсан нөхөр, эсвэл хаяж чадахгүй архичинаа тэжээн дээр нь 4 нялх хүүхдэдээ өдрийн талх олж өгөхөөр бага хэмжээний зээл авч эргээд түүнийгээ төлж чадахгүй “Залилан” гэдэг гэмт хэргийн үйлдэгч болж 5-8 жил шоронд сууна.

Эсвэл 10 жилийн аймшигт хүчирхийлэл дунд амьдран хүний тэсэж болох хязгаар тасрах үед “Энэ хүний гарт нэг өдөр амь үрэгдэх үү, эсвэл өрсөж хөнөөгөөд өөрөө шоронд сууж хүүхдээ ч болсон асрамжинд өсгөх үү” гэдэг эцсийн сонголт ирнэ. Эх хүн эцсийн мөч ирэхэд үр хүүхдээ боддог юм гэнэлээ.

Монгол эрчүүд өдөр бүр эхнэр хүүхдээ хайрлаж, амьдралынхаа хариуцлага ухамсарыг мэдэрч, эр хүний хийморь өөдөө “Өрхийн тэргүүн” шиг явбаас “Эмэгтэйчүүдийн эрхийг хамгаалах өдөр” байхгүй байсан ч болох юм.

Төрсөн өдөр мартын 8-наар өгдөг улаан өнгөтэй сарнайгаа хаяа нэг ажил тарсны дараа зүгээр бариад ороод ирдэг, гашуун хар усыг тэвчиж гэр бүлдээ цаг заваа зарцуулдаг болчихвол Монгол өрх бүтэн болж Монгол улсын заяа өөдөө байх болно.

Ч.Ганжавхлан

АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД
172.101.82.153 huts, chi uuruu eregchin bietei, emegchin bodoltoi gar. mongol dayaaraa emegteichuud buh asuudaldaa erchuudiig buruutgaj bna, getel chi gej neg er hunii biend havhlagdsan emegtei, ganjavhlan guai. you are a women trapped in a woman”s body, nothing else.
103.26.195.106 Сэтгэгдэл бичигсэд эрчүүд байхаа.
59.153.114.182 gomo monhoo n bainaa martaar bayarlah l heregtei lde
49.0.132.119 Тийм шүү мартын 8-ныг нэг караоке баранд ашиг оруулсан жирийн нэг өдөр болгожээ
103.9.90.231 Эрхээ хамгаал, хамгаал

Ч.Ганжавхлан

Ганжавхлан. Ч 1988 онд Улаанбаатар хотод төрсөн. 2004 он Солонгос улсын Dankook-н их сургуулийн хэлний бэлтгэлд, 2007 он Бээжин хотын төв санхүү эдийн засгийн дээд сургуульд, 2009 он Сингапур улсад хэлний бэлтгэлд, 2011 он АНУ-н Virginia мужийн Arlington хотын Lado International College сургуульд, 2012 он Санхүү Эдийн засгийн дээд сургуулийн MBA мастерт тус тус суралцсан. Олон нийтийн ажил: 2010 он Бээжин хотын МОХ-ны сургалтын албаны дарга 2010 он “Би жирийн нэг Монгол залуу” ном 2011 он “Нэг хуудас цагаан цаас” илтгэл /БНХАУ-н Элчин сайдын яам/ 2012 он “Бүгдээрээ дулаахан өвөлжье” сайн үйлсийн аян санаачлан зохион байгуулж “Хамтын халуун сэтгэл” залуусын нэгдлийг эхлүүлсэн 2012 он “Хүний наймаа”-ны эсрэг тэмцэл өрнүүлсэн 2012 он Сайн дурын байгууллагуудын нэгдсэн сүлжээнээс Хүчирхийллийн эсрэг үндэсний төвийн төлөөлөл болж “Оны шилдэг залуу сайн дурын ажилтан” шагнал 2012 он “Оны шилдэг сайн үйлстэн” номинацид “Бүгдээрээ дулаахан өвөлжье” аянаар шалгарсан 2012 он СЭЗДС-н Манлайлагч оюутан 2013 он “Лантуун дохио” ТББ-г үүсгэн байгуулсан 2013 он “Боорцог ба Сарнай” номоо албан ёсоор нээсэн