“Говийн чоно-2015” эхэллээ

2015 оны 03 сарын 24

ОБЕГ, АНУ-аас Монгол Улсад суугаа Элчин сайдын яам, АНУ-ын Номхон далайн хуурай замын цэргийн командлал хамтран “Говийн чоно-2015” газар хөдлөх гамшгийн хор уршгийг арилгах, туршлага солилцохоор Улаанбаатар хотноо өнөөдрөөс дадлага, сургуулилалт хийж эхэллээ. Энэ сарын 27-нд дуусах сургуулилтад ОБЕГ, үндэсний аюулгүй байдлыг хангах тусгайлсан чиг үүрэг бүхий байгууллагууд, гамшгаас хамгаалах улсын албад, АНУ-ын Ази Номхон далайн хуурай замын цэргийн командлал, Аляскийн үндэсний гварди, хүмүүнлэгийн тусламжийн олон улсын байгууллагууд оролцож байна. 

Дөрөв дэх удаагаа зохион байгуулж байгаа “Говийн чоно-2015” дадлага сургуулилалт нь газар хөдлөлтийн аюул тохиолдсон үед бэлэн байдлын төлөвлөгөө боловсруулах, цэрэг-иргэний харилцааг зохицуулах, олон улсын хүмүүнлэгийн тусламжийг хүлээн авах ажиллагааг боловсронгуй болгоход ихээхэн ач холбогдолтой юм. Энэ үеэр “Чингис хаан” олон улсын нисэх онгоцны буудалд олон улсын хүмүүнлэгийн тусламжийг хүлээн авах, Хан-Уул дүүргийн нэгдсэн эмнэлэг дээр газар хөдлөлтөд нэрвэгдэгсдэд тусламж үзүүлэх аврах ажиллагааны дадлага сургуулилалт болно. 

Э.Эрдэнэцэцэг

Овог нэр: Эрдэнэцогтын Эрдэнэцэцэг Төгссөн сургууль, он, мэргэжил: Кино урлагийн дээд сургууль. 2012 он. Сэтгүүлч Шагнал: 2013 оны "Өнөөдөр" сонины тусгай бичлэгийн шагнал, "Балдорж" сангийн сарын шилдэг бичлэгийн шагнал 2012 оноос "Өнөөдөр" сонины Нийгэм, шуурхай мэдээллийн алба