Сурагчид үдийн цайнаас хордсон эсэх нь өнөөдөр тодорхой болно

2016 оны 05 сарын 04

Нийслэлийн Чингэлтэй дүүргийн нутагт үйл ажиллагаа явуулдаг 61 дүгээр сургуулийн сурагчид нэгэн зэрэг өвдсөн хэрэг өчигдөр гарлаа. Эцэг, эхчүүд нь хүүхдүүдээ хоолноос хордсон байж болзошгүй хэмээн үзэж буй. Учир нь тус сургууль цайны газаргүй, байгуулах зай талбай ч үгүй аж. Тиймээс “Үдийн цай” хөтөлбөрийн хүрээнд сурагчдадаа компаниудаас хоол авч өгдөг аж. Өчигдөр тус сургуулийн бага ангийн зургаан бүлгийн 202 хүүхэд үдийн цайндаа “Хаан сүү” компанийн нэрсний шүүс ууж, “Алиман сар” компанийн гурилан бүтээгдэхүүн иджээ.

Гэтэл 3д ангийн 13 сурагч гүйлгэж, бөөлжсөн аж. Тиймээс Яаралтай тусламжийн төвд хандан, тэднийг эмнэлэгт хүргэжээ. Энэ талаар тус сургуулийн захирал А.Мөнхчимэгээс тодруулахад “Үдийн цайны дараа 13 сурагчийн гэдэс мушгисан. Одоогийн (өчигдөр 17.15 цаг) байдлаар 10 хүүхэд нь гэртээ харьсан, гурав нь эмнэлэгт эмчлүүлж буй. Бусад сурагчийн эцэг, эхтэй холбогдож, биеийн байдлыг нь асуухад хэвийн байна гэсэн” гэв.

Тус сургууль “Алиман сар” компанитай хоёр дахь жилдээ хамтран ажиллаж буй бол “Хаан сүү” ХХК-ийн бүтээгдэхүүнийг өнгөрсөн намраас худалдан авч эхэлсэн байна. Ийнхүү сурагчид өвдсөн учир нийслэлийн Чингэлтэй дүүргийн Мэргэжлийн хяналтын хэлтэс тэдний үдийн цайндаа идэж, уусан бүтээгдэхүүнээс дээж авч, шинжлэхээр болжээ. Шинжилгээний хариу өнөөдөр гарах бөгөөд сурагчид хордлого авсан эсэх нь үүгээр тодорхой болох юм байна.

Г.ЦЭЦЭГ

АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД
220.191.168.25 ene odo yu ve? Aimaar yumaa.
202.70.46.213 Tiim hachin ym huuhduuded ogchihood udiin tsai gd bhii

.