“Монос” групп GMP стандартад нийцсэн эмийн үйлдвэрийн цогцолбор ашиглалтад орууллаа

2016 оны 05 сарын 02

-Зайлшгүй шаардлагатай эмийн  дотоодын үйлдвэрлэл нэмэгдэнэ-

“Монос” групп олон улсын GMP стандартад нийцсэн, орчин үеийн дэвшилт техник, технологиор тоноглосон эмийн үйлдвэрийн цогцолбор ашиглалтад оруулан, өнгөрсөн пүрэв гаригт нээлээ. GMP (Good Manufacturing Practice буюу Үйлдвэрлэлийн зохистой дадал) нь Дэлхийн эрүүл мэндийн байгууллагаас эмийн үйлдвэрлэлд зориулан гаргасан багц стандарт юм. Тус группийнхэн 2009 онд “GMP стандарт хангасан эмийн үйлдвэрийн цогцолбор” төслийн судалгаа хийж эхэлсэн бол барилгын ажлыг 2012 онд эхлүүлэн, ийнхүү ашиглалтад оруулсан байна.

Дэлхийн жишигт нийцсэн “Монос” эмийн үйлдвэрийн нээлтийн үеэр “Монос” группийн ерөнхийлөгч, ТУЗ-ийн дарга, төрийн шагналт, академич Л.Хүрэлбаатар “Уг төслийг хэрэгжүүлэхэд дэмжсэн Европын сэргээн босголт, хөгжлийн банкны хамт олонд талархал илэрхийлье. Энэхүү үйлдвэрийг ашиглалтад оруулснаар монголчууд хамгийн сүүлийн үеийн технологиор үйлдвэрлэсэн олон төрлийн эм бэлдмэлийг хэрэглэх боломж бүрдэж байна. Мөн Монгол Улсын эм үйлдвэрлэлийн хүчин чадал хоёр дахин нэмэгдэх юм” хэмээн ярилаа.

Түүнчлэн Эрүүл мэнд, спортын яамны Төрийн нарийн бичгийн дарга С.Ламбаа “GMP стандартад нийцсэн, аварга том үйлдвэр ашиглалтад оруулснаар Монгол Улс дэлхийн дэвжээнд өөрийн нэрийн бүтээгдэхүүнээ хүргэж боломжтой болж байна. Уг үйлдвэр эм хангамжийн системд томоохон дэвшил авчирна гэдэгт итгэлтэй байна” гэв. Мөн Аж үйлдвэрийн сайд Д.Эрдэнэбат “Монос” групп Монголын эм, биотехнологийн салбарт цоо шинэ хуудас нээж байна.

Монголоор хязгаарлагдахгүй, гадаадын олон оронд бүтээгдэхүүнээ нийлүүлэхээр маргаашнаас ажиллах нь зүйтэй” хэмээн тэмдэглэв. Нээлтийн ёслолын дараа УИХ-ын дарга З.Энхболд дагалдан яваа хүмүүсийн хамт үйлдвэрийн үйл ажиллагаатай танилцсан юм.

Монгол Улсын төрөөс үндэсний үйлдвэрлэлийг дэмжих, импортыг орлох, экспортыг дэмжих, зайлшгүй шаардлагатай эмийг дотооддоо үйлдвэрлэх бодлогын хүрээнд “Монос” групп уг цогцолборыг ашиглалтад оруулснаар үйлдвэрийн хүчин чадал нь 3.5-3.9 дахин нэмэгдэж буй аж. Улмаар жилд 352 сая шахмал эм үйлдвэрлэх юм байна. “Монос” групп үйл ажиллагаа явуулж буй 26 жилийнхээ түүхэнд эмийн салбарт манлайлагч байж, олон удаа анхдагч болж байсан. 2005 онд Эм бэлдмэлийн лаборатори нь MNS/ISO 17025 олон улсын стандартын шаардлага хангаж, итгэмжлэгдсэн, 2014 онд “Нефромон” эмийг хойд хөршид худалдаж эхэлсэн нь Монголын анхны экспортын эм болсон зэргийг энд дурдаж болно.


Мөн өнгөрсөн онд “Монос” эмийн үйлдвэрийн үйл ажиллагаанд олон улсын ISO9001 стандарт нэвтрүүлжээ. Тэгвэл ийнхүү GMP стандартад нийцсэн шинэ эмийн үйлдвэр ашиглалтад оруулснаар олон улсын гурван чухал стандартыг нэвтрүүлж, дэлхийн жишигт хүрсэн эмийн үйлдвэр болж буй хэрэг.

GMP стандартад үйлдвэрийн гадаад орчин, барилга байгууламж, үйлдвэрийн дотоод зохион байгуулалт, ус, агааржуулалтын систем, тоног төхөөрөмжийн нарийвчилсан техникийн шаардлагууд болон үйлдвэрлэлийн зохистой дадал, тогтолцоо, ажиллах хүч, түүхий эд материал, бүтээгдэхүүний стандарт шаардлага, баримтжуулалт зэрэг багтдаг байна. Агаар, цэвэр орчны зэрэглэл гээд бүх зүйл нарийн хяналттай байна гэсэн үг.

Хананд жаахан цууралт гарсан тохиолдолд л GMP стандарт биш болчих учраас үйлдвэрийн сууриас авахуулаад тоног төхөөрөмж суурилуулах гээд бүх шатанд зургийн дагуу ажиллах шаардлагатай байсныг “Монос” группийн гүйцэтгэх захирал Х.Ананд ярилаа. Цаашид цогцолборт аюулгүй байдал, ариун цэвэр, дотоод дэг журам, хяналтыг маш өндөр түвшинд байлгах нь. Иймээс ч Европын сэргээн босголт, хөгжлийн банкны Монгол дахь суурин төлөөлөгч Мэтью Ле Блан “Монголд 10 жилийн өмнөөс үйл ажиллагаагаа эхлүүлснээс хойш 80 төсөлд 1.3 тэрбум ам.долларын хөрөнгө оруулалт хийсэн.

Энэ хугацаанд хэрэгжүүлсэн хамгийн хэцүү, сорилт ихтэй төслүүдийн нэг нь тус эмийн үйлдвэрийнх байлаа” гэсэн биз ээ. Тэрбээр “Уг төсөл нь олон нийтийн сайн сайхны төлөөх үйлсэд хөрөнгө оруулах бидний стратегитай нийцэж байгаа. Ийм хүнд төслийг эдийн засгийн амаргүй үед, олон улсын стандарт нэвтрүүлж, амжилттай хөрөнгө босгож, хэрэгжүүлсэнд баяр хүргэе” хэмээсэн юм. Тус төсөлд 9.8 сая ам.долларын хөрөнгө оруулсан агаад Монгол Улсын эм үйлдвэрлэлийн салбарт хувийн хэвшлээс хийсэн хамгийн том хөрөнгө оруулалт болсноороо онцлог.

GMP стандартын хамгийн чухал хэсэг нь ус, агааржуулалтын систем гэдгийг мэргэжилтнүүд хэлж байна. Агааржуулалтын систем нь цагт 64.000 шоо метр агаарыг цэвэршүүлэх хүчин чадалтай, нийт 1000 орчим урт хоолой бүхий гурван иж бүрдэл төхөөрөмжтэй юм байна. Тэгвэл усны систем нь усыг найман үе шатаар шүүж бэлтгэдэг аж. GMP стандарт нь үндсэн байшин дотроо давхар байшин барилга барих буюу өрөөний зохион байгуулалтыг тусгай ган листэн хавтан модулаар хийх шаардлагатай байдаг гэнэ.

Модул нь өрөөний хана, тааз, булан тохой, холболт, хаалга, цонхыг иж бүрнээр нь шийдсэн битүүмжлэлийн өндөр зэрэгтэй, гал, усанд тэсвэртэй зөвхөн эмийн үйлдвэрт зориулагдсан материал юм байна. Их хэмжээний хөрөнгө оруулан, эмийн үйлдвэрийн цогцолбор ашиглалтад оруулсан нь зөвхөн “Монос” группэд бус, иргэдэд, Монгол Улсад ихээхэн нөлөөтэй нь мэдээж. Чанартай эмээр хангагдахаас гадна импорт багасаж, бусад оронд бүтээгдэхүүн экспортлох боломжтой учраас тэр. 

Нээлтийн үеэр Л.Хүрэлбаатар “Төслөө долоон жилийн өмнө боловсруулан, Европын сэргээн босголт, хөгжлийн банктай хамтран 9.8 сая ам.доллар буюу 20 гаруй тэрбум төгрөгийн хөрөнгө оруулан, үйлдвэрийнхээ эхний ээлжийг ашиглалтад оруулж байна. Таван сая ам.долларын хөрөнгөөр шингэн, тосон, лаа хэлбэрийн, гален эмийн үйлдвэрийг хоёр жилийн дараа ашиглалтад оруулахаар төлөвлөсөн” гэв. “Монос” эмийн үйлдвэрт 70 орчим нэр төрлийн, чанартай эм үйлдвэрлэн хэрэглэгчдэд боломжийн үнээр хүргэж байв. Тэгвэл одоо дээрх тоо 90 болон нэмэгдэж, эмийн чанар илүү сайжрах юм байна.

Тэдгээр 90 нэр төрлийн бүтээгдэхүүний 50 хувь нь Монгол Улсын зайлшгүй шаардлагатай эмийн жагсаалтад багтсан байдаг аж. Дээрх төслийн гүйцэтгэх захирал И.Балжинням “Бид ажиллах хүчээ бэлтгэхэд анхаарч, жилд гадаад, дотоодын 20 орчим сургалтад хүмүүсээ хамруулж байна. Хэрэглэгчид ойрын хоёр сарын дотор шинэ үйлдвэрт үйлдвэрлэсэн бүтээгдэхүүнийг хүлээн авах боломжтой. Цаашид Польш, Казахстан улсад эм нийлүүлэх судалгаа хийгээд байгаа” гэлээ.

Түүнчлэн Х.Ананд “Шинэ үйлдвэр нээгдсэнээр дотоодын эм үйлдвэрлэлийн хүчин чадал хоёр дахин нэмэгдэж, бүтээгдэхүүний чанар сайжирч байгаа. Хоёрдугаарт, Монгол Улс 2020 он гэхэд бүх эмийн үйлдвэрийг GMP стандартад нийцүүлэх шаардлага тавьсан. Эмийн үйлдвэр тус бүр GMP стандартад нийцэх биш, Монгол Улсын эрэлтийг хангах хүчин чадалтай манай үйлдвэрт аутсорсинг хэлбэрээр эмүүдээ өндөр чанартай үйлдвэрлүүлэх боломжтой.

Гуравдугаарт, олон улсын стандартад нийцсэн бүтээгдэхүүнүүдийг бусад улс руу экспортлох боломж бүрдэж байгаа” гэж тэмдэглэв. Нээлтийн ажиллагааны төгсгөлд “Монос фарм” компанийн гүйцэтгэх захирал М.Одгэрэлд үйлдвэрийн түлхүүрийг гардуулан өгсөн юм. Монгол оюун сэтгэлгээг дэлхийд таниулахаар зорьж байгаа “Монос” группийнхэн 2018 онд үндэсний эмийн бүтээгдэхүүн дэлхийд өрсөлдөнө гэсэн зорилттой ажиллаж буй.

 Ц.Болор

 

АНХААРУУЛГА:
Та сэтгэгдэл үлдээхдээ ёс бус хэллэг үл ашиглан сайтын хэрэглэгчийг хүндлэн соёлтой оролцоно уу! Зочдын сэтгэгдэлд Mongolnews.mn сайт ямар нэгэн хариуцлага хүлээхгүй болохыг анхаарна уу.
СЭТГЭГДЛҮҮД
37.220.133.161 saihan medee baaina. Emee uursduu uildberlene gedegt mash tom amjilt .Ulam ih amjilt husie.

.